糖室 (已結業)

食完品香樓，想要係石硤尾搵間靜靜地嘅餐廳，再續下場，真係幾難下。好彩有當地朋友話我知，有間新開嘅甜品鋪，質素唔錯，咁就一於試下。餐廳離品香樓極近，位置都頗為隱蔽，係一堆大排擋形式餐廳嘅中間，唔識路嘅可能需要搵一陣。餐廳裝修行自然民宿風，以木頭做主調，好岩情侶朋友黎食。甜品選擇多而特別，好多都好吸引，定價唔算貴。芒果冰芋圓黑白涼粉，睇得出餐廳係擺盤上都落足心思，配合餐廳裝潢，以木碗同木匙做器皿，加分！味道係出乎預料地好，芒果冰打得好細，而且味道濃郁，食得出唔係加左好多水。黑涼粉原來係用左黑糖整，而白涼粉就加左椰汁，好少係出面食到。唯一美中不足嘅係，芋圓或者因為太凍嘅關係，略嫌咬感太硬。清甜蜂蜜鮮果冰，冰量裝得好滿，本身冰入面都加左奶，就咁食已經好正，即刻消熱。食左幾啖之後，可以加餐廳provide嘅蜂蜜，但因為啲冰太凍嘅關係，蜂蜜係會結塊，而唔係融入啲冰到，不過口感因為咁都幾得意。水果新鮮唔特別。