樂天皇朝 (雅蘭中心)

營業中

休息中

其實間中都想食吓樂天皇朝嘅小籠包，今日就約咗朋友嚟呢度，順便同佢慶祝生日。門外已經有非常清晰嘅餐牌，就算要等位都可以睇定食乜。以今時今日嘅餐廳嚟講，呢間嘅規模都算幾大間，環境寬敞坐得舒服，約朋友嚟就啱晒。前菜花生栗子雖然並非名貴菜式，但佢嘅花生同栗子炆得好好食。嚟得呢度，一定要叫佢嘅特色皇朝小籠包，因為可以試晒八款唔同嘅口味。點菜後店員就會遞上說明書，建議由原味(白色)開始，再順序品嚐人參(綠色)、鵝肝(啡色)、黑松露(黑色)、芝士(黃色)、蟹粉(橙色)、蒜香(灰色)，最後係麻辣(紅色)。其實每一款嘅味道都好突出，而我尤其喜歡佢嘅蒜香同麻辣味，當然傳統嘅味道亦相當出色。另外我哋揀咗李白醉雞，去咗骨嘅醉雞啖啖肉，亦都充滿酒香，肉質鮮嫩令人回味。油麥菜除咗配豆豉鯪魚，原來配麻醬都一樣咁好食。麻醬油麥菜用一片好薄好薄嘅青瓜捲住新鮮嘅油麥菜，方便蘸麻醬進食，清新之中帶點芝麻香。最後叫咗份主食，鮮蝦抄手拌麵總共有四大隻鮮蝦抄手，鮮蝦非常爽口，而佢嘅醬汁帶有酸、麻、辣嘅味道，真係非常醒胃。原來下午茶時段仲有六折優惠，下次攞半日假嚟可以嘆吓佢嘅下午茶。