金公館 (康怡廣場北座)

營業中

休息中

近日，疫情開始有反彈嘅跡象，不過趁仲未好嚴重，都想同家人一齊慶祝生日。今次就揀咗呢間位於太古的中式菜館——金公館。是日係星期五，七點都唔算好多人，我哋入座之後就決定菜單！第一個菜就係鍋巴脆皮糖醋魚，鍋巴炸到脆卜卜，魚肉亦都外脆內軟，連細骨都可以食到，蘸埋糖醋汁，非常開胃，推薦！第二個就係招牌北京填鴨，鴨片厚薄適中，又脆口，連青瓜同京蔥絲一齊食，加埋甜醬同芝麻醬，令人流哂口水！第三個就係小炒——霸王脆骨蝦球，蝦球爽口彈牙，辣辣哋，好惹味！第四個就係好出名嘅傳統名菜——夫妻肺片，佢嘅肺片好入味，又爽口，對於鍾意食辣嘅我就覺得好正，想拎啲辣汁去撈飯食！食完四個菜式之後，係時候要食個甜品滋潤下，呢個用桂花做嘅桂花冰粉唔會太甜，味道啱啱好，啖啖桂花嘅香氣，用嚟收尾簡直一流！總括嚟講，今次嘅生日飯非常滿意，見到屋企人食得咁開心，我就開心，希望疫情快啲過去，我哋再可以開開心心咁去食過！