杏甜品 (豉油街) (已結業)

心情好又要食甜品～心情唔好都要食甜品～今日就去咗尖沙咀食杏甜品💕💓見到有“木蓮凍”系列，坊間都冇見過，幾新奇～所以就嗌咗一個芒梛木蓮凍，芒果粒好多，鋪滿1/3個面，另外2/3分別就係4色芋圓同埋梛果，中間仲有一大球芒果爽冰，好爽呀！而配料下仲有濃郁嘅芒果汁，食落口有天然芒果果香，而最下面就係主角木蓮凍。木蓮凍口感類似仙草，都係好嫩滑～配上芒果汁同埋配料真係完美。食完芒梛木蓮凍，芒果爽冰嘅口感真係令我一試難忘～於是即刻嗌多個榴槤爽冰。榴槤爽冰塞得滿滿的～上面仲有大量嘅爆珠增加口感。榴槤爽冰好香榴槤香氣，榴槤飄香。最後仲試埋佢哋嘅自家製湯圓～試咗幾種特別口味，分別係奶黃、榴槤、抹茶口味。首先係榴槤口味，湯圓皮煙韌又不會太厚，一咬下去就有撲鼻的榴槤香氣。而奶黃口味真係好似食緊奶黃月餅咁，都係一樣咁流心，不過可以濃味多少少就最好啦！而抹茶估佢唔到係最好味，抹茶味夠濃郁，而且茶味甘而不苦澀，配合甜甜的糯米皮，的確完美。總括而言，甜品價錢公道，而且環境和味道都不錯。假如行完尖沙咀，想搵個地方休息下，呢間甜品店是個不錯的選擇。