星海薈﹒譽宴

營業中

休息中

今日去沙田遊，朋友介紹覓食點位於石門萬怡酒店嘅星海薈。酒樓環境舒適，唔算太大20枱左右。可能我地入座時候較遲，所以只有3-4枱客。入座後樓面同事即刻奉上一大鍋熱水供簡單清洗餐具，疫情間呢啲小舉動都令人心安。而優惠方面於晚市時段凡惠顧正價小菜一款，每枱倆位或以上可免費品嚐三選一嘅菜式一款。我地點左個姜葱龍蝦滑雞煲配金銀蛋浸時蔬。龍蝦係波士頓龍蝦，肉質鮮嫩彈牙，雞肉亦相當入味香口惹味，份量都唔少。金銀蛋浸時蔬湯底清甜，但個人較喜歡配莧菜會好食啲，可惜今日只有菜苗。時日推介有粉絲蒸扇貝，火喉岩岩好，貝肉開邊依然肉厚，而鮮滑粉絲吸滿貝肉嘅汁好正。落單經理為我地介紹左椰青燉花膠雞湯，簡單嘅食材就配搭出，滋潤嘅靓湯，貪心作怪如果花膠份量倍增會更好。招牌菠蘿咕嚕肉--每次唔知點乜咕嚕肉都唔會令人太失望。今次無失望之餘仲有意外驚喜，有老師傅嘅味道鬆脆外皮帶微微嘅吉士粉甜味，酸甜開胃咕嚕汁掛喺外皮上，新鮮菠蘿肉(唔係罐頭)真係好味。而免費嘅菜式我地揀左清蒸虎杉斑仔，雖然免費但都好肥美，總括服務，衛生環境，食物質素都唔錯，有80分。