好彩海鮮酒家

營業中

休息中

喺假日嘅下午一家人想搵個地方嘆茶，揀咗九龍城廣場間好彩，因為知道餐廳坐得比較寬敞，可以坐得耐少少。我地大概1點半到達，等咗幾分鐘就可以入座啦，今次等位人數相對平日少。三個人點咗8碟點心，啱啱好食得曬，又唔會太飽或者肚餓。咁多點心入面比較鍾意蘿蔔糕。蘿蔔糕一共有四件，每一件唔算好大嚿。 蘿蔔糕唔算太油膩，而且唔會一夾起就成嚿散曬。另外叫咗粉果，一共有三件。雖然餡料充足，但係一夾起個皮就散咗，搞到啲餡跌曬出嚟，非常狼狽。叉燒包嘅水準都ok。如果要食得飽嘅，可以點呢一類包類嘅點心。另外點咗個比較特別啲嘅薄撐，煎得非常薄，睇得出師傅用過心機去煮。唔會太鹹或者甜，亦都唔會太油膩。切食六份左右，值得一試。最後點咗一碗粥，大概係兩個人嘅份量。粥嘅味道可以接受，但係餡料好似唔係好多，下次可能會改叫皮蛋瘦肉粥。今次飲茶以桂花糕作為甜品。桂花糕嘅味道好香，女士們就最鍾意食。酒樓環境夠寬敞寧靜，食物質素都合格，最唔好嘅就係啲職員質素真係好麻麻，個個都黑口黑面，少咁啲笑容真係會影響食客嘅心情。