卅二公館

營業中

休息中

今日嚟咗呢一間高級中菜廳，真係大開眼界，無論食物以致服務都係非常高嘅水準。第一樣想講嘅係櫻花蝦蘿蔔糕，平時食到嗰啲櫻花蝦一嚟冇咁香二來好多時都食到啲蝦殼，呢一度完全唔會出現呢啲問題，設成三角形嘅櫻花蝦蘿蔔糕煎香咗之後棟高上碟造型非常之靚仔。第二樣要講嘅就係黑椒和牛酥，佢個樣就好似平時嗰啲蘿蔔絲酥餅咁樣，而佢個酥餅皮做得非常之鬆化，好好味。第三個點心係原味鮮肉小籠包，佢嘅小籠包嘅皮做到好薄，夾嘅時候要特別小心，入面嘅湯又唔會太滾，唔會灼傷個口。佢啲鮮肉都用了非常靚，好香豬肉味。第四樣係脆皮鮮蝦腸，呢個點心都係做得非常之好，呢種脆口嘅腸粉其實好考師傅嘅功夫，因為腸粉皮嘅溫度同埋濕度直接影響佢炸脆咗嘅部份，另外就係由師傅整好直到食客入口就真係要同時間競賽，所以如果想做得好，要考慮嘅嘢係非常之多，呢度做得非常好。最後一樣亦係我覺得最好食嘅一樣，就係鴨絲沙律，用了非常新鮮唔再講，佢嗰個沙律菜有和蕎頭、冰菜、車厘茄等，佢個汁做得非常之好，另外入邊有輕微金甘苦苦嘅味道， Mix埋就成件事好balance，好好味。