牛丼新造

營業中

休息中

上年開始，希慎廣場地庫搖身一變成為美食廣場，對於住銅鑼灣嘅阿叔要搵食真係方便咗好多。呢度除咗有我最鍾意嘅本地手造雪糕外，仲有咖啡、日式定食、泰國船麵、漢堡包、生蠔意粉等，包羅萬有。今期阿叔趁住平日例休，終於有機會嚟幫襯呢間開咗無耐、見唔少foodie朋友都有介紹嘅慢煮熟成牛肉飯專門店。專門店位於B2層，全店採用開放式設計，大家既可一邊食飯，一邊睇住師傅即場炙燒牛肉。🐂慢煮熟成牛肉 ($88)熟成牛肉8大塊，塊塊都呈鮮嫩粉紅色，賣相好吸引！網上搵資料，原來餐廳採用嚟自美國嘅優質牛肉，喺指定溫度同濕度嘅環境下自家熟成21日，之後再以60度慢煮一個鐘，所以牛肉唔單止口感軟腍，而且仲會食到香濃嘅牛味。個人嘅私心推介，阿叔一向都係濃味仔，建議熟成牛加錢配蒜香醬油炒飯 (+$6) 同日本「蘭王」生雞蛋黃 ($6)。食之前，飯連蛋黃、餐廳自家製嘅鮮忌廉同紅酒照燒汁一次過撈均，跟住再以牛肉包住飯一齊食，濃厚醬汁、滑溜牛肉、惹味炒飯一次過品嚐，味道層次極之豐富，值得一試！