陳儀興牛什粉麵 (鴻祥大廈)

營業中

休息中

久唔久都會想食吓牛腩麵，呢間位於旺角，主打多款牛什粉麵，連罕有部位都有提供，例如沙瓜、牛坑腩、崩沙腩，限量供應，想食嘅要趁早去，因為都幾多人幫襯。牛三寶淨食份量唔少，牛腩牛筋牛肚各有差唔多10件，煮至軟身，超級入味，個人最鍾意牛腩，一咬即化，牛筋少膩，牛肚帶點咬口，下面仲有生菜，新鮮又鮮甜，性價比高。湯麵要咗崩沙腩，表面有一層橫膈膜連住腩肉，肥瘦適中，軟腍味香，係牛腩中嘅極品。麵條吸滿湯汁，不過要趁早食，如果唔係會發脹，一碗都幾多，細食嘅可以兩個女仔Share。小食有菜有炸物，健康少少嘅可以要菜，好綠好鮮，生菜比起菜心更甜，見旁邊嘅炸魚皮都好吸引，值得試試。飲品方面有驚喜，自家製，清涼解渴，試試無妨。