牛摩 (上水廣場)

營業中

休息中

好耐冇嚟上水行街，原來上水廣場多咗好多嘢食，行吓行吓上咗上水廣場5樓，見到牛摩呢間放題火鍋店，價錢好似唔錯，望到啲食物都好吸引，就決定去試吓。我哋叫咗牛小排呢個餐，叫咗兩個唔同嘅湯底，一個係博多牛骨濃湯底，另一個係港式特濃沙嗲湯底，兩個湯底都好好，濃而不鹹。開始點食物，上食物嘅時間非常之快，牛方面我哋叫咗牛小排，牛腹肌，牛舌，同埋牛肩隻，四款牛都各具特色，重點係牛味非常之濃，呢個咁抵食嘅價錢可以食到咁嘅質素嘅牛肉真係非常之抵食。睇埋出面嘅免費自助吧，蔬菜種類非常之多，而且非常之新鮮，另外有啲丸類豆腐等等。另外仲有小食任點，飲品方面，選擇都算多，另外仲有幾款甜品同埋熱嘅芝麻糊，仲有自助雪糕，一個咁抵嘅價錢可以食到咁多唔同嘅嘢，個人認為係非常之正。