興記菜館

營業中

休息中

近排天氣開始凍，食煲仔飯最啱，即刻諗起去廟街，上一次幫襯可能係6-7年前，興記菜館有四個舖位，夜晚10點去到都仲要排隊。揀咗臘腸滑雞煲仔飯，另外加咗小炒 - 避風塘炒蜆，同埋揀咗出面少見嘅煎蝦餅（有分大份同細份），嘢飲就要咗自家製嘅菊花茶。避風塘炒蜆一上枱已經覺得好香，蜆肉食落去冇沙，第一次食用避風塘去炒，香辣嘅蒜粒連埋蜆肉食非常有風味。煎蝦餅蝦肉沾左麵粉漿，炸至非常脆，平時煎蠔餅就食得多，大家想試新嘢都可以試吓呢度嘅煎蝦餅。臘腸滑雞煲仔飯等候時間比較耐，一揭開香噴噴，雞肉好滑，臘腸好香，有少少飯焦，整體嚟講唔錯。