Paper Moon

營業中

休息中

小妹生日當晚，同老公去咗Paper Moon慶祝。呢間餐廳好難預訂，經常爆滿，要預早兩個星期預約。原本想訂室內窗口位，但已經full Booking，所以揀咗室外位置。好好彩當晚天氣溫暖，天色明朗，對住個無敵大海景，好舒服、寫意同浪漫。只可惜坐我哋後面的一對男女吸煙不停，令一個美好的晚上帶來小小遺憾。我同老公6點入坐，未肚餓之餘本身又好細食，所以淨係點咗兩個主菜同一壺洋甘菊查：期間限定的白松露羊肝菌意大利飯同燒美國穀飼牛柳。白松露羊肝菌意大利飯：第一次食白松露，感覺新奇，但味道比黑松露淡同無咁香，所以以後我都只會揀味道香濃的黑松露。意大利飯有點失色，質感麻麻，無咬口，做唔到al dente嗰種軟稔中帶點煙韌嘅口感。不過今次都係一個好難忘嘅嘗試，淨係自己生日先捨得試呢啲高尚食材。燒美國穀飼牛柳：我哋叫咗5成熟，佢都算做到嘅。肉質還可，唔硬但亦唔係好嫩嗰種。我好欣賞同鍾意佢嗰胡椒汁，好香，同牛肉味好夾。雖然無乜驚喜，但值得一試。服務不過不失，價錢唔貴但亦唔算係平，值得繼續光顧。