麻辣風雲 (已改名) 查看

今日朋友想挑戰麻辣野，比佢地酸菜魚所吸引而來，座位好闊落，好有中國古式風味，仲好幸運可以坐到店內唯一嘅涼亭特色枱。炸饅頭 $58, 係招牌小食，用木制戰船上碟，造型相當有氣勢，炸得熱辣辣又香脆，配煉奶真心無得輸。主角酸菜魚 $268，碟頭一樣大大件，足夠4至5人分享，選用生魚，魚片份量超多，肉質幼滑得黎挺身爽口，澄海酸菜味道香，清爽，不會過咸，湯頭加入青胡椒，花椒，味道麻麻香香，配芽菜同粗身薯粉，吸收香濃湯汁，後悔沒有加30蚊加配額外薯粉。香辣茶葉炒蝦 $188，炸過嘅茶葉味道有點似炸九層塔，蝦仁炸得咸香，帶辣勁，惹味。干鍋係比較特別嘅菜式，可以自選醬汁辣度同蒜度，除左基本蔬菜配料，可自選最少5款配料，我就揀左勁蒜小辣，美國肥牛，特色牛肉餅，鴨血，肥腸，豆干，茄子，一大盤上枱，份量真係好誇張，夠5至6人分享。味道惹味蒜味濃。甜品係黑糖脆炸糍粑 $58, 見到出菜量，目測基本上全場客人都會叫1碟，炸脆嘅糯米糍粑，配上微甜黑糖醬同黃豆粉，熱辣辣香脆軟糯，相當滋味，叫多碟都絕對可以清哂。大部份菜式都係川辣嘅，遇到想食辣野或者酸菜魚嘅日子時，第一時間就會諗起呢度。