Milu Thai มิลู่ไทย (亞士厘道)

營業中

休息中

好食又都算抵食嘅泰菜！嚟到必食嘅應該係招牌菜「火山排骨」，見到差唔多枱枱都點。其實呢個係曼谷拉差達火車夜市嘅招牌地道美食，一片片啖啖肉嘅排骨堆疊成巨型火山咁，唔只好食，打卡亦一流，所以爆紅！不過喺香港就唔係間間泰國菜都有，就算有亦未必間間好食。Milu Thai呢度嘅火山排骨係我食過最好食之一，肉質炆到軟淋淋夠晒嫩彈，手撕就得，淋上酸酸辣辣嘅青辣椒蒜頭醬汁，完全做出曼谷夜市嘅風味精髓，香辣美味，可選擇辣度，大大份啖啖肉都只係$228，人多share最好。再逐個餸講吓... 泰式燒魷魚：火候控制得好好，燒出魷魚濃郁焦香又唔會韌，仲好厚肉。鹽燒鰂魚：魚肉鮮嫩，外皮香脆，阿仔自己都食咗半條，不過等佢大個識得食辣，點埋個泰式酸辣汁就會再領略到更高層次嘅美味喇😏蒜蓉通菜：建議大家必點，能夠將一個蒜蓉通菜炒到咁香咁fresh咁好食，真係唔係度度可以食到。見到呢度有露天區域，不過而家太熱，遲啲天氣涼啲，坐出去應該幾正。