叠記咖喱

之前去澳門成日特登去食咖喱麵，估唔到終於開咗嚟香港啦。而且仲有幾間分店，三間分店嘅位置都好方便，今日咁啱經過見到，咁就一於嚟試吓啦。我就叫咗個牛三寶麵，因為好食得辣，所以叫咗個勁辣，一上枱就已經聞到勁香嘅咖喱味，飲咗啖湯果然又香又辣，但係佢嘅辣味一啲都唔傷胃，個湯飲落好舒服。我認為最抵讚嘅就係佢嘅面底有好多選擇，我就叫咗橡筋粗麵，連埋個湯真係好好食，因為佢嘅面質雖然彈牙，但係都好掛湯，食落好香口。另外仲叫咗個咖喱三寶小食，我認為佢嘅豬皮最好食，因為夠大塊，而且吸晒啲咖喱汁，真係好香。因為朋友唔係太食得辣，就叫咗個小辣，我試咗少少個湯底。雖然唔係好辣，但係比較易入口同埋好開胃。而且呢度嘅碗碟好靚，碗同筷子都印咗舖頭名，非常適合打卡。而且呢度嘅牛筋都好好食，食落牛嘅質素好高。呢間餐廳又平又抵食，我覺得仲好過澳門嘅咖喱麵，不過嗰日佢都唔算太多人，希望多啲人知道呢間好食嘅咖喱麵店啦。