阿三大牌檔

營業中

休息中

一般黎講，喺大埔要食大牌檔之類嘅野都係要去新街市（大埔墟熟食中心）。大牌檔通常都係同鑊氣小炒掛勾，阿三除左有小炒之外仲有滷水同串燒等等，或者你可能覺得唔夠專注同傳統，但係我就覺得只要食物有水準，呢種多元化嘅融合係可以接受嘅。既然係咁，就叫左滷水拼盤、啫啫通菜煲同埋黃金蝦球。 🍖滷水拼盤就算叫細碟都幾大份，基本上都係豬腸、豬耳、鵝、腎等等，估唔到仲有豬手，呢個比較少見。 🥬啫啫通菜煲對我黎講係一種情意結。讀書嗰陣食過啫啫芥蘭煲之後就一試愛上。雖然今次係通菜，但係都唔錯。 🍤黃金蝦球就係蝦球沾上鹹蛋黃再拎去炸，炸漿唔會太厚身，充滿鹹蛋黃味嘅炸蝦球好惹味。 整體黎講都幾好食，已列入返兜名單。咕嚕脆皮豬頸肉同蒜子火腩炆大鱔煲都好似幾吸引。