韓屋

營業中

休息中

沒錯，又是韓國餐，近期幾乎迷上了韓國美食，皆因他們的地道菜式都真係幾特別，所以跟朋友約去另一間韓國小店食下其他野，呢間餐廳主打韓式住家熱湯及石鍋拌飯。雖然幾想飲薯仔豬排骨湯，血腸湯及海鮮大醬湯都幾特別，但無奈胃就只得一個，在一輪選擇困難症發作之下，最終決定點了一份蔘雞湯。蔘雞湯甫上桌仲熱騰騰，用湯匙輕輕一切就可以𠝹開原隻BB雞，雞肚內釀滿人蔘、大棗、板栗、松子仁及糯米，因為熬煮時間夠長，所以雞肉好軟淋，連細骨都可以咬碎食埋入肚，湯底好濃蔘味，甘甘甜甜，感覺好滋補養生，飲完暖笠笠。至於炒豬肉石鍋芝士拌飯，賣相好吸引，除豬肉片外，配料都算豐富，整個碗面鋪滿翠玉瓜、紅蘿蔔、豆芽、菠菜及紫菜等，攪拌後仲可以見到芝士的拉絲效果，石鍋最底下還有少許飯焦，建議醬料可以多放一點令拌飯更香口惹味。另外亦點了兩籠餃子王，一籠是原味，餡料以豬肉、韮菜及粉絲為主；另一籠是泡菜餃子王，呢個自己幾鍾意食，泡菜味夠辣，餡料非常豐富飽滿。他們的特大餃子煎餅都好想試，但已經太飽了，唯有下次再食。