清真惠記

營業中

休息中

朋友介紹嘅，今次已經係第三次幫襯啦。呢度最出名嘅三寶分別係咖喱羊腩、焼鴨同蝦子柚皮。 燒鴨試過，似乎“過譽”咗啲，食唔出有乜分別； 蝦子柚皮始終未試過； 反而咖喱羊腩確實濃郁惹味，並唔羶，難怪啲印度朋友、印尼菲島姊妺都嚟捧場…咖喱佢哋食唔少，邊間掂佢哋就最清楚！今次我同朋友要咗咖喱羊腩同咖喱牛腩每碟連飯只需26元，我自己亦分別打包咗咖喱羊腩、咖喱牛腩同咖喱雞，每碗要37元，好似無咁抵！ 兩餐咖喱，兩種不同感受…我第一次試咖喱牛腩，因為每次都賣晒。啲牛腩一“舊舊”大大件，雖然有啲“下欄”嘢，都係啖啖肉，不過啲咖喱好似無上兩次咁香…朋友話佢食嘅咖喱羊腩飯比較多骨，仲未飽…罪過罪過！他亦覺得今次無以前咁香，係咪我哋期望大咗，無咗嗰份驚喜…返到屋企，同太座囡囡再開餐！ 雞、牛、羊都試勻。 我將雞、牛、羊分開用煲加熱，難怪咖喱羊腩係鎮店之寶，羊腩嘅肉汁滲入咖喱汁內，咖喱汁又加重咗羊腩嘅香味，加埋香料嘅味道，咪埋眼仲以為自己身在印度… 咖喱牛腩同咖喱雞雖然無咁惹味，但係都好難响其他地方食到。 唯一係食完勁口喝，要準備啲水果椰青潤喉至好！大致上，清眞惠記飯店嘅咖喱以濃香取勝，屬印度口味，稍為鹹咗啲