合益泰小食

營業中

休息中

早幾日見討論區有ching話去呢到食腸粉受到不禮貌對待而發現到呢間小店，即刻去搵食評睇下，見到好多人讚好果，世界上最好味等等，即刻心思思想試下啦，咁岩今日有事去深水埗，就一早睇定食乜啦，同時亦都有心理準備會坐得逼，冇服務可言呀。下午3點多去到，已經見十幾人等緊外賣，由於爬過文所以識得直接入去等位，地方真係好窄，小小通道企左人等位，避開姐姐送餐及拉回放碟個桶入去洗，等左5分鐘要左避右避，好彩都叫快有位，打算叫碟大腸粉做小食就算，個死佬又話要埋魚蛋，咁就叫埋啦，好快有得食，送到黎已經有豉油及麻醬，自己自行加甜，辣醬同芝麻，我勁鍾意多甜，所以可以自己加真係正呀～味道方面係幾好味嘅個醬，腸粉都夠熱，麻醬好香，不過好似有加豬油，即刻覺得有罪惡感啦～不過下次都會再黎食嘅。題外話，我見好多人有讚個腸粉好滑好好味，但其實好似係向第二間廠拎貨返黎蒸熱佢，咁應該要讚就讚間供應商廠？