串燒王 (登龍街)

營業中

休息中

後疫情時代，香港人嘅生活習慣改變咗好多，踏入夜晚9點嘅香港，最怕空氣突然安靜。如果依家三更半夜想搵宵夜食，比以前真係難咗好多，但都唔係無選擇呀！位於銅鑼灣嘅串燒王就將登龍街變得熱鬧，每一串嘅串燒都非常惹味，成為深夜夜繽紛之選！皇牌牛舌心絕對係串燒王嘅名物！牛舌心厚切，大大塊夠晒足秤，肉質爽口唔靭，牛肉味香濃，性價比超高，牛舌控嘅我要叫多幾串先得。紐西蘭羊架食串燒又點少得羊架呢！羊架嘅生熟度燒得啱啱好，肉質軟腍，帶有微微嘅焦香味，油脂豐富，但因為經過大火燒過，所以唔油膩。肥牛金菇卷金菇索晒肥牛嘅油香，重點係金菇唔會燒到乾爭爭，加上特製嘅調味，小小辣，非常惹味！蒜蓉原條茄子茄子真係枱枱都叫！原條茄子燒得啱啱好，唔會太乾身，茄子上面鋪滿調味粉，但味道唔會過鹹，味精帶有少少辛辣感，加上蒜蓉嘅香味，味道充滿層次。串燒我哋另外叫咗五花腩肉串、豬頸肉、日本一口和牛粒、雞腎串、脆香雞皮，特別喜歡油份平均嘅五花腩肉串同豬頸肉，如果喜歡脆口嘢嘅話，脆香雞皮就一定要叫，炸到脆卜卜，夠晒香口。