泰好味

營業中

休息中

有朋友晌外國返嚟，第二時間約埋一齊行山，但估唔到，佢話嗰邊地大，草地多，公園多，但就無咩山可以行，今次返嚟兩個多月，就行返夠本。故此，一行3人，由荃灣經元荃古道行到嚟深井，方便離開，而到達深井，就嚟到深井臨時街市內嘅熟食檔「泰好味」，簡單食番碗泰式粉麵。呢個臨時街市都臨時咗好耐，裡面等同美食廣場咁樣，有好幾間餐廳，供應唔同地方菜，而座位就好似啲舊式快餐位，依家賣少見少，冷氣就唔好期望喇，靠晒幾把大牛角扇。食物選擇及價錢，一張A4紙餐牌睇晒，簡單4行嘢：泰式湯粉、泰國香葉油飯、小食、飲品，而嗌咗粉飯，飲品有半價優惠。呢度都跟上潮流，落單後俾部傳呼機仔你等通知，唔晒企晌門口等。泰式海南雞泰粉 $38、泰式椰汁冰 +$9啲海南雞雖然無話排到好靚仔，但味道確喺好唔錯，雞肉非常之嫩滑，有雞鮮味，雞皮好爽口，皮下脂肪少；泰粉就即喺金邊粉，幾滑溜。原本想飲龍眼冰，但賣晒，椰汁冰我都OK，最緊要喺行完山有杯凍飲爽吓嘛！行完山，食碗湯粉就啱啱好，墊到肚又唔會太飽。難得知心友人一齊行山、食晏、吹水。