616牛肉火鍋專門店 (翠怡花園)

營業中

休息中

身為大埔幫，竟然依家先發現到呢間牛魔王，見到門口餐牌上有好款牛肉，每碟平均大約50零蚊，個陣有唔少人等位，應該都值得一試。呢度用Ipad落單，見到咩想食就㩒咩，極度方便，我哋先㨂咗個牛清湯底餚住先，再嚟就係啲牛肉，有啲仲之後再返叫咗添。腩頭有趙口但唔係韌，越食越出牛嘅脂香同肉味，超正，所以呢個就返叫多一碟。封門柳食到濃厚肉味，幾乎零脂肪，真係616就食得，5秒鐘啱啱好。牛滑估唔到呢個都有驚起，肉汁多而且牛味重，仲夠爽彈，又係正。牛坑爪明顯係筋位，但花紋幾靚，亦係有趙口，爽爽嘅感覺，本人都係鐘意腩頭多啲。胸口膀即係平時出面叫開嘅牛白肉，都係爽爽嘅，亦係帶出脂香嘅一款。牛扑肉就似平時安格斯，肉味，脂香又係同時帶出。牛駝峰有高級安格斯嘅感覺，係雙倍嘅味道，更香更濃，肉質又嫩口，又係返叫之選。脖仁相比以上兩款，呢個就較為普通，但都好食，我諗呢個部位嘅特色係油花密但幼細，容易入口。最後講埋個黑拍葉，雖然都係爽爽嘅，但佢配個日式芝麻醬又幾有新鮮感。一次過食到好多平時都唔知道有咁多款嘅牛，咁其實依家就會知道原來自己係鐘意食邊幾款，呢餐唔止醫肚咁簡單，而且係比個味覺學到嘢，下次就更識食了。