新泰東南亞餐廳

營業中

休息中

尖沙咀依間「新泰東南亞餐廳」簡直係尖東嘅地標，依度嘅食物出品唔錯，不過個椰青班戟同想象中有所出入，就有少少失望，可能因為依間餐廳都多生意，依度嘅Staff做嘢好快手，不論上菜定收枱，但服務都好好，會主動加水及換碟。*此餐廳收取加一服務費。香辣海鮮炒河（單點$108），好足料，大蝦肉質爽口，味道鮮甜，魷魚口感彈牙，食落好惹味，青口食落好新鮮，味道香辣，河粉炒得夠乾身，食落辣度6分，會越食越辣，配料包括有蘆筍、車厘茄、秀珍菇、珍珠筍、紅椒、紅蘿蔔、洋蔥、香葉、生菜。香芒軟殼蟹米紙卷（單點$98），表面鋪有炸蒜，米紙卷口感煙韌，內有生菜、芫荽、米粉，略嫌一半米紙卷近乎沒有軟殼蟹、香芒，軟殼蟹口感酥脆，香芒味道香甜，配以泰式香檸汁食用，味道更佳。燒豬頸肉沙律（單點$88），燒豬頸肉份量多，表面鋪有洋蔥、香葉、芝麻、辣椒、芫荽、香蔥，豬頸肉肉質爽口，味道酸辣，生菜口感爽脆。椰青班戟（單點$60），本來以為係類似可麗餅類型嘅Pancake，點知食落比較類似年糕，班戟口感軟糯，食落帶點焦香味道，表面鋪有椰漿，內有椰子肉，味道清甜。