泰基隆泰北面 (已結業)

泰基隆就食得多，泰基隆泰北面早幾個月先第一次食。叫咗個泰北魚湯麵，麵底揀咗金邊粉，湯底要少辣。麵上枱，先呷一啖湯，偏鹹偏濃，好強嘅魚味同香料味，據稱係以鮮魚淆製兩個鐘，再加入乾蔥，蒜肉，辣椒乾，甲猜（手指薑）等配料，果然好泰風味。麵入面嘅餸有魚蛋，豬紅，鳳爪同泰式鹹肉。揀呢個麵其實好大程度都係因為泰式鹹肉（我超鍾意食），結果有少少失望，可能因為晚上幫襯，鹹肉放耐咗，鹹香有餘，但皮較韌，唔太脆。其餘食材以魚蛋質素較高，爽滑彈牙有魚味，至於豬紅同鳳爪則正常水準。值得一讚係碗麵好大碗，之前驚唔夠飽，食哂之後其實係要捧住個肚。