維港灣餃子坊 (已結業)

一條友本來想食日本嘢，蕩下蕩下見到間舖大大隻字寫住「手工餃子」，正中下懷，老闆又好殷切地响門口推介，就決定一試。開响元朗後街唔算太熱鬧嘅地段，新開張都算多人入去試。叫咗個白菜豬肉湯豬骨湯餃，一個煎黑松露餃（其實想試個野生松茸餃，一樣價錢），一個炸香芋蕃薯球。最先嚟係+$6 嘅大大杯凍豆漿，甜度同濃度都剛剛好，唔會甜得嚟飲完成口酸味，而且好大杯，一定夠飲。白菜豬肉湯餃（8隻）件頭相當大，雖然唔係喜歡嘅灣仔碼頭口感，但食得出手工包嘅靚皮靚餡，豬骨湯底清得嚟唔會太淡，冇乜味精味，飲完唔會口渴。值得一提係佢個醋唔係一般偏酸嘅淅醋，係比較似意大利黑醋嘅陳醋咁嘅，有輕微澀味同香味，醋酲可以重手啲。黑松露同豬肉本來就夾到絕，再加上薄薄餃皮手工包住煎過，點埋個醋，就完滿咗空虛咗成日嘅味覺。所有食物應該都係即點即蒸/煎/炸，溫度絕對有保證。炸香芋蕃薯球有驚喜，推介。家庭式作業，兩位後生放學就去幫手，自動自覺，有辦有眼，足見家教。