老上海飯店

營業中

休息中

呢間上海菜一直喺wishlist上面，但一直都未有機會試。咁啱媽咪想母親節食上海菜，所以就預先喺openrice訂位。餐牌上款式好多，但我哋得幾個人所以就只點咗以下幾樣。紅燒獅子頭一上枱睇個樣都估到好味，醬汁色水夠深，而且令立立。獅子頭有兩大件，肉質鬆軟可以用筷子輕易夾開，入口鬆化，無肉渣。雖然都知道一定係肥豬肉比例多先做到呢個口感，但食落唔算油膩。肉絲炒麵麵底炸得夠乾身好酥脆，唔會過份油膩。茨汁好多肉絲筍絲非常足料。蜜汁火方係每次食上海菜必點，呢度個金華火腿比一般嘅切得更厚更大塊。火腿肥瘦適中，伴碟嘅蓮子鬆化。用饅頭夾住火腿同蓮子食，一啖食到火腿嘅鹹香同蜜汁嘅甜味。另外仲點咗蘿蔔絲酥餅，千層酥皮紋路明顯，賣相好靚。餡料除咗清甜嘅蘿蔔絲仲有金華火腿粒，食落比較重口味。本身想留肚食甜品，例如拔絲香蕉、高力豆沙同豆沙窩餅。但係都食唔落喇，唯有下次再嚟啦。