黑木亭居酒屋 (金馬倫道)

話說日本通番關後，身邊唔少朋友已經番左鄉下啦~～搞到我都好羨慕！不過未去到旅行既我，惟有去日本餐廳感受個氣氛先！呢間一上樓梯就好似去左新宿街頭咁，別有一番風味～MENU圖文並茂，啤酒拉麵勁吸睛，等我嗌番碗先！波士頓龍蝦刺身，鮮少食龍蝦刺身，入口非常爽脆，比起赤蝦其口感更加爽口，帶淡淡鮮甜，非常驚喜！日本啤酒拉麵，賣相充滿特色，一開頭以為真係用啤酒裝住，原來內有乾坤。用忌廉配上拉麵醬汁製作成嘅啤酒拉麵，沾上忌廉嘅拉麵口感creamy ，出奇地好食，不過食到中間會有少少飽膩，整體來講啤酒拉麵創意滿分！天婦羅茄子田樂燒，原條茄子奉上，份量好足夠！外層輕輕炸至脆身，咬落去外脆內軟，加上燒汁令茄子特別入味，同時食到茄子嘅香甜味。石鍋龍蝦泡飯 ，食完龍蝦刺身，師傅就會原隻將龍蝦製作成二食，將龍蝦熬製成湯，變成泡飯。每啖都食到濃郁嘅龍蝦湯汁，而龍蝦蝦頭更非常濃郁，蝦膏佔滿整個蝦頭，鮮香味濃！龍蝦鉗啖啖肉，肉質彈牙，鍾意食龍蝦非常推薦！北海道士多啤梨牛乳乳酸，酸酸甜甜帶士多啤梨香味，而且賣相亦都不錯！芒果烏龍熊茶，淡淡芒果味配上烏龍茶，整體唔算太甜，但有微微回甘，唔嗜甜人士就啱晒呢款！