老街 (已搬遷) 新店位置

星期六約左朋友係新寶戲院睇戲所以諗住係附近食lunch 咁岩見到對面有間台灣野好多人排隊就去左試啦！呢間叫老街既台式理料裝修好有特色，好靚好有懷舊feel,岩哂打卡啊！我地兩個女仔叫左一個雞扒便當，紅燒牛肉麵同埋炸豆腐拼鹽酥雞！飲品方面我就點左香濃朱古力，加3蚊就有得加埋珍珠！而朋友就點左水蜜桃茶！首推紅燒牛肉麵！牛肉煮得夠哂軟身好好食，湯底濃郁好入味！不過麵個質地唔似平時既台式粗麵，係比較幼身，有少少似拉麵。而雞扒便當份量好足，好抵食。大大塊照燒雞扒加滷肉飯，仲有半隻滷水蛋嫁！雞扒肉質嫩滑，個皮脆卜卜幾好食！而滷肉飯上面既豬肉略嫌太瘦，唔夠油香！另外仲有店員推介既炸豆腐拼鹽酥雞！兩舊大大舊既豆腐磚，炸到外脆肉軟，配埋酸甜醬加青瓜絲真係好正！鹽酥雞就夠哂香口，要趁熱食啊，雞辣辣食先正兩杯飲品不過不失，無咩特別！總括黎講，味道ok，最重要係野食大份抵食，兩個人食都係百幾蚊，食到超飽！值得一試！