麵屋武蔵 虎洞 (北角匯二期)

營業中

休息中

晚餐時段黎到北角匯，見到拉麵好吸引就入黎試下啦。白虎叉燒拉麵（$78）成碗叉燒拉麵都偏鹹，兩片薄切叉燒都幾香同好淋，另外溏心蛋煮得啱啱好，食落唔會太生，筍同麵都係軟硬適中，幾好食。黑虎叉燒拉麵（$78）湯底同樣偏鹹，叉燒好軟好香，溏心蛋同筍都係煮得啱啱好。同白虎唔同嘅係，黑虎係黑蒜油拉麵，面頭會有一層黑蒜油，但係食落無乜蒜香味，反而成碗麵都變到好油，麻麻地。唐揚豆池魚（$38）呢個小食反而有啲驚喜！份量適中，炸魚仔細細條好香口、容易食，再點埋個芥末汁就更香，好食！武藏炸雞配芥末沙律醬（$38）炸雞黎到嘅時候係熱辣辣，食落都好脆。全碟有5-6塊，份量都適中。炸雞上面淋嘅係芥末沙律醬，食落有好淡嘅芥末味，酸酸地咁，無普通沙律醬咁膩，都唔錯。店員講起先知依家like佢地社交平台會有第二碗半價嘅優惠，計返都幾抵。整體黎講拉麵口味都偏鹹，如果食得淡嘅人可能會唔慣。