悅滿軒

如果唔係屋企人介紹都唔知道有饒宗頤文化館依個地方，裏面仲有間真正隱世又高質嘅餐廳添！點餐後先送上微暖嘅自家製蕃茄麵包，外面烘得好脆而且好香蕃茄香草味，配上黑水欖牛油夠特色。海膽汁濃郁好鮮味，手工意粉有嚼勁又掛汁，加埋彈牙嘅粒粒八爪魚肉，令人回味無窮。伊比利亞羊架啖啖肉，帶有淡而香嘅羊羶味，外面煎到焦香但肉仍然好嫩，配埋甜甜地嘅砵酒汁真係好夾；羊肉腸亦都好特別，比平時食開嘅豬肉雞肉腸味道更濃仲有油香。牛腹肉脂肪較少重肉味，五成熟嘅口感好嫩滑，本身調味唔多，另外附上粗鹽、墨西哥青醬、雜椒汁同芥辣自由配搭。伴碟仲有原個焗蒜頭，蒜肉焗到腍晒食落原來幾香甜。最後食埋個apple crumble，面頭嘅焦糖裝飾夠搶眼，金寶焗得香脆，冷熱交融好滋味，連雪糕都係自家製嘅，真係好有誠意呢！