六両三.台灣食堂 (已結業)

之前食過尖沙咀嘅六両三，最近發現原來佢喺觀塘都開咗間分店。呢晚到訪，見餐牌選擇非常之多，除咗有傳統嘅台灣麵食之外，仲有煲仔飯同火鍋，非常吸引。煲仔飯價錢為$108，包煲仔飯之餘，仲有青菜，花枝丸或甜不辣及台式飲品一杯。煲仔飯有多款口味選擇，包括台式三杯雞、北菇滑雞、創意芝士蕃茄海鮮煲、豉汁排骨、咖喱牛筋腩及三寶臘味煲仔飯。天氣開始轉涼，想食煲仔飯又多間選擇。除咗煲仔飯之外，餐廳亦提供一個二人豪華套餐（$258），入邊已經包咗兩個小食、兩個麵食、青菜及兩杯台式飲品。呢晚點咗個二人餐，小食點咗皮蛋豆腐及鹽酥雞，麵食分別揀咗紅燒牛肉麵及半筋半肉麵各一。兩款牛肉麵嘅牛件都好入味，份量好足。皮蛋豆腐亦非常大碟，豆腐入口嫩滑，配埋帶糖心嘅皮蛋及木魚，口感非常豐富。鹽酥雞份量亦相當多，炸得非常香口，外脆內軟。值得一讚，鹽酥雞唔會過分鹹，味道不錯。飲品分別點咗珍珠奶茶（+$8）及薑母茶，兩款口味都不俗，珍珠夠煙靭，薑母茶亦夠晒薑。餐廳食物質素不錯，價錢亦都合理，唔怪之得星期日嘅晚上都見唔少人幫襯，亦有甚多外賣單。