尚盛潮州海鮮飯店

今日去咗間好有溫度嘅潮州菜館，呢度應該有啲歷史，裝修樸實，大部分侍應都係中年人，好nice 又風趣，時不時過嚟傾兩句，加下茶水，人情味十足。食潮州嘢，梗係先飲功夫茶。功夫茶好夠熱，茶色清澈透亮，味道醇厚帶甘，準備好味蕾食大餐！先講滷水鵝片併豆腐，呢度嘅拼盤絕對抵食，鵝片份量好多，色澤誘人，肉質嫩滑，味道甘香濃郁，送飯一流😋我哋喺蠔仔烙同水瓜烙中間掙扎好耐，最終決定定點後者。水瓜烙賣相一流，外皮煎得香脆，入面好足料，每一啖都有水瓜，仲有好多蝦仁、肉碎、花生等等，口感同味道都好豐富，而且水瓜烙唔會太過油膩，輕鬆食晒一碟😌之後侍應推介椒鹽鮮魷，果然係色香味俱全😍 魷魚炸得金黃酥脆，炸漿已經調味，唔點任何嘢都夠味！鮮魷肉質鮮嫩，真係食到停唔到口，呢個絕對係必勝推介👍糖醋麵色澤亮麗，我自己唔鍾意加醋，脆麵加埋砂糖已經好好食🤤最後仲有綠豆爽送，不過我哋真係太飽，婉拒咗～ 最後飲埋熱辣辣嘅功夫茶作結，今晚真係好滿足。