Tivoli 意大利餐廳

營業中

休息中

星期五又到左我哋返腳出動嘅時候喇，今次同同事揀咗呢一間喺公司附近嘅意大利餐廳，佢入面成日都好似黑蚊蚊咁，但係個感覺就好似以前細細個好期待去食聖誕大餐嘅餐廳。平時行過覺得佢好似好貴，但係睇到個餐牌其實個價錢真係唔算貴。我叫咗個焗菠菜魚柳飯，同事就叫咗焗海鮮飯，吞拿魚意粉，牛柳餐，火腿溫泉蛋意粉。同事叫咗個牛柳餐汁另上，黎到嗰陣時個汁冇分開，員工一啲都冇黑面而且仲即刻拎返入去再整過，其中一位叔叔不時同我地傾計，仲主動幫我地揸機影相，十分親切呀。個焗飯好好味，又夠熱，好香芝士味，但又唔會搶左魚味，重點係個魚柳唔係平價龍利，係啲質素好啲有啲口感既魚柳，有魚味，有肉質。而且個汁比例剛剛好，唔會太多或太少，仲有好多波菜。最後點左咖啡，叔叔仲每人俾左粒朱古力我地，話以前傳統餐廳會咁做，杯咖啡會好飲啲。食物同服務都好滿意呀，而且重搭了童年的回憶，香港仲有幾多餐廳會有人情味。下次一定再黎！