半島漁港/阿翁火鍋館

營業中

休息中

收工返嚟已經好攰懶得煮，去T Town搵食，經過半島漁港門口先醒起之前都食過佢其他分店。原來$1嘅海南文昌雞、至尊燒鵝王及極品BB豬仍然做緊優惠，咁就俾佢個優惠吸引左入去。酒樓燈光光猛、空間寬敞，晚市見除左食小菜外，亦有做埋火煱，都幾多人食。坐低叫左壼茶，點左幾個菜，唔駛十五分鐘已經已經上齊曬，上莱速度超快，啱曬我呢啲心急嘅人，唔駛食完一道菜坐喺度等食🤪酒樓其中一個賣點係即燒燒鵝，依家咁抵食，非點不可。 燒鵝以玻璃器皿上枱，要讚嘅係全程以蠟燭保溫，燒鵝真係唔錯，外皮燒至又薄又香脆，肉質依然嫩滑juicy，好正。家常菜菠蘿咕嚕肉，酸甜度剛好又啖啖肉，幾鐘意佢個菠蘿放旁邊，唔會沾上個汁。平時食茄子肉醉煲最怕就係太鹹，我幾鍾意呢度個茄子煮出黎唔會成pat 野咁，送飯好正。鮑魚金錢鵝掌煲係必點的，冬菇超大隻，厚肉又爽口，鮑魚肉質軟又煙靭，食完個煲感覺食左滿滿的骨膠原。最後食埋個煮到好綿嘅紅豆沙，真係好滿足。今晚整體食物好味、份量足，坐得舒服。但今晚做左大嘥鬼，下次都唔可以再眼闊肚窄。