金萊原盅蒸飯

營業中

休息中

收工出黎旺角，本來想食吉野家，但發覺太多人排隊，又唔想食金拱門。突然醒起朗豪坊隔離有個熟食中心，於是就去望望。行左兩三個圈，就揀左呢間金萊原盅蒸飯，因為望落價錢最平食到個飯。叫左個土尤蒸肉餅飯，上菜好快，連錢都未收，叔叔就轉個身叫廚房整個肉餅同飯出黎，仲有油菜送。服務態度都十分十分好，第一次光顧唔知野飲點收錢，我問佢：「凍飲要唔要加錢？」佢亦都好好態度咁同我講：「凍飲加２蚊，熱飲唔洗加錢」最後我都係無加錢叫左杯熱檸水，但叔叔依然好好態度咁話：「無問題」，又即刻轉個身沖左杯熱檸水比我。服務滿分！當時６點４５分左右，都算幾易搵位，好快咁就坐低開餐，第一眼望落賣相唔錯。先試左啖菜，幾爽口清甜，不過都有少少偏鹹，如果落少啲調味會更好。而個肉餅我先試左一口，唔。。。都幾鹹下，或者因為客人都以藍領居多，佢地比較食得鹹。最後我決定將個肉餅夾起，晾乾啲鹹鼓油，先再放落啲飯一齊食。肉餅仲有少少扣分係因為偶爾咬到幼身硬骨物體，應該係因為去骨唔太完整。飯入口有少少偏硬同乾，可能係因為我只係連肉餅食，無加鹹鼓油落去。如果你食得鹹，加番少少落去口感會更好。