黑門水產すいさん (棉登徑)

因為好掛住日本☹️，所以今日我同朋友去咗尖沙咀食呢間黑門水產すいさん，一解思鄉之愁！呢間舖頭位置近K11 artmall，地鐵站N4出口，行5分鐘就到，相當方便。舖頭裝修幾特別，掛咗啲吊燈籠、貝殼，十足十去咗日本咁。咁我哋坐低之後就叫咗海膽蟹味噌甲羅燒、黑門角切魚生丼、蒲燒鰻魚飯同埋長崎伊佐木。海膽蟹味噌甲羅燒蟹殼入面有蟹膏、蟹籽、蟹肉、鵪鶉蛋同埋海膽，全部嘢撈埋一齊之後，蟹味香濃，食到海膽鮮甜味，再配上香脆梳打餅一齊食，一次食到兩種唔同口感，值得一推！黑門角切魚生丼呢個魚生丼配料豐富，每啖都食到鮮甜嘅魚肉刺身、蟹籽、三文魚子、玉子、青瓜等，口感豐富，鍾意食魚生丼飯嘅你就唔好錯過啦！蒲燒鰻魚飯大大塊鰻魚鋪喺蛋絲同埋白飯上面，賣相幾吸引，配合埋拌有鰻魚汁嘅飯一齊食，幸福感滿滿！長崎伊佐木呢碟刺身魚賣相幾特別，刺身一片一片咁鋪喺木板上邊，肉質柔軟細嫩、厚薄適中，配合埋柚子豉油一齊食，鮮味十足！