日作食堂

營業中

休息中

平時放工行過呢度，每次見到呢間木系餐廳都好想食。今晚同朋友食生日飯，就搵個機會食吓先。餐廳日式木系裝修，日本昭和年代style，有課室桌椅同跳木馬，充滿校園味道。餐牌種類多，有鍋物、定食、刺身、小食同串燒，連甜品都有，最後我哋叫左個刺身定食熟食定食。四色極上丼：海膽好有鮮味，油甘魚厚切大塊，入口帶少許油脂，松葉蟹肉同魷魚都幾好，飯較黏口，整體幾好食。鰻魚山藥燒配醬油溏心蛋帆立貝烏冬：鰻魚無草青味，味道甜甜地，口感較實淨，咬落去唔會散曬。另外有蛋餅，口感Q彈得嚟爽口。烏冬配料用左蘭王蛋做溏心蛋，山藥就爽口，帆立貝都幾好食，唔錯。定食伴菜：麵豉湯有蜆仔，鹹味剛好。青瓜爽口，味道清新，微酸，而腐皮帶少少甜酸感覺。沖繩海鹽雪糕球：顏色夠搶眼，甜味較一般雪糕突出，幾好食。日本北海道千層蛋糕：唔太甜，口感較結實，有層次感，都ok喎。日式玉露茶 (定食飲品)：綠茶其中一種，凍熱各一杯，味道甘，無苦澀味，幾好。