龍亭

呢間主打鐵板燒嘅餐廳藏身於大埔市區一角，門口相當隱蔽，未必一眼睇得出，要按門鈴等職員開門，感覺好似入咗私人會所咁，神秘感十足。不過餐廳內部空間比較細，座位唔多，適合鍾意靜靜地慢慢食嘅人。叫左杯美人梅酒，酸酸甜甜，幾開胃。前菜沙律用上有機蔬菜、煙三文魚同中華沙律啫喱，清新有層次。法國生蠔份量十足，有兩大隻，上面鋪滿大粒魚子，配埋wasabi魚子醬一齊食，海味濃郁但完全唔腥，反而好清甜，令人印象深刻。白松露蟹籽溫泉蛋賣相精緻，蛋白滑到似湯，蟹籽啖啖咬開爽脆，啡色嘅松露香味撲鼻，層次感豐富。跟住上枱嘅係紐西蘭龍蝦寶寶，淋上加拿大海膽醬，蝦肉鮮嫩彈牙，其中一隻仲有滿滿蝦膏，濃郁鮮甜。燒和牛油脂分佈靚，包著蔥、沾上炸蒜。配上蘑菇，惹味又唔膩，但反而配菜如白蘑菇黑松露更令人驚喜。炒飯以三文魚子同蟹籽炒成，鹹香有咬口，份量啱啱好。甜品係吉士紅豆pancake，煙靭似糯米糍，甜度適中，為成餐畫上完美句號。整體體驗滿意，食材新鮮、味道有驚喜，但場地細同位置隱蔽，如果唔介意呢啲，絕對值得一試。