斗滾 (適安大廈)

營業中

休息中

早前同男朋友去西環食Cafe個陣，見到山道附近開左間新店，新開張期間仲可以Like 社交平台任食手切牛頸脊添。-一坐低，店員就介紹斗滾既食法。先食麻辣雞煲、蒜蓉蒸海鮮，後飲養生燉湯，再用養生湯做湯底，落料打邊爐。-麻辣雞煲可自選大中小辣，炒完一開煲蓋，麻味超香～～～～～雞件非常入味，而且斬得夠細件，唔會食到成嘴都係醬，食得辣既建議叫中辣以上，會再過癮啲。同埋可以任添，好抵食～～～-等蒸海鮮既期間可以去自助區攞定火鍋配料，自助區以丸類、蔬菜類同麵類為主，亦有鵝腸、豬皮、牛百葉、水魷魚、皮蛋等等。-自助飲品區大約有10款飲品，比較特別既係有自家製涼茶飲！涼茶唔會太甜，好有屋企既味道。-蒜蓉粉絲蒸海鮮有龍躉件、花甲、蟶子、扇貝、鮑魚仔、粟米仔同烏冬。海鮮配以荷葉同蒜蓉蒸，帶荷葉香之餘，鮮味十足，連烏冬都好好食，完美咁索哂海鮮既鮮甜味！-蟲草花花膠燉竹絲雞非常清甜，蟲草花香氣濃，竹絲雞啖啖肉，入口即化，足足飲左半煲先肯停手。-之後就正式打邊爐啦，鵝腸新鮮爽脆，蘿蔔、粟米同娃娃菜配清甜既養生湯岩岩好，令蔬菜更甜。不過最推薦嘅都係手切牛頸脊，入口軟腍爽彈，牛肉味非常濃，但又不失其油脂香，超級推薦。