申子居酒屋

營業中

休息中

喺香港食居酒屋真係好貴，但因為特別日子想慶祝吓，所以嚟咗呢度食。我哋一共嗌咗七樣嘢，每樣嘢都唔錯幾好食，雖然價錢少少貴，但都值得一試！三式迷你Don佢係三個好細嘅碟仔，分別裝住海膽、三文魚子、蟹肉飯，比較印象深刻嘅係三文魚子，佢每一粒食落都有爆珠嘅感覺，一咬就會爆出魚油，魚油味唔腥仲有d鹹香，唔錯唔錯，另外海膽都幾鮮甜好食。大蔥雞肉燒佢上面嘅雞肉燒得非常香脆，鍾意食雞肉嘅人真心可以一試。鹿兒島A4和牛茶漬飯一直以為茶漬即係用茶泡飯，但原來係熱雞湯浸落生嘅和牛同飯， 但食落又冇話好有雞湯味，只能話ok。申子玉子燒一送到上嚟，木板上係放左一塊和牛，上面擺咗一舊飯團同蛋黃，店員會即場燒，燒完之後，撈埋飯同流心蛋黃係幾好食，而且燒嘅過程可以打卡😂。吉列三重芝士千層豚肉每舊豬扒入面都會夾住芝士， 食落豬扒有肉汁，調味啱啱好唔會淡，但係送到過黎嘅時候已經冇流心嘅感覺，所以有少少失望，但吉列豬扒有肉汁都已經好難得。燒牛脷個口感幾似牛柳粒，可以加檸檬汁或者用鹽去點，哩樣我就覺得比較平凡。抹茶心太軟食落甜甜地但冇乜好香嘅抹茶味，整體尚算OK，算係我地嘅慶祝畫上完美嘅句號❤️。