盈苑

營業中

休息中

對於我呢啲個個星期六都要返工嘅人嚟講，星期六係紅日，都係唔錯嘅一件事，變咗可以連續休息兩日。聽日唔使返工，就同老婆出觀塘行吓街。阿媽話好耐無食呢間啲點心。難得佢有建議，就食呢間啦!呢間餐廳內部結構係中式風格。侍應十分有耐心同態度好好！而且食材十足，份量好大，所以我覺得幾抵食！手拍青瓜海蜇 - 青瓜拼海蜇小食擺盤都幾靚，青瓜味道清甜爽脆；海蜇出奇地有小小辣，口感也夠爽囗✨喺唔錯嘅開胃小食😆星級乾炒安格斯牛河 – 牛河熱辣辣上枱，已經傳出陣陣香氣。牛肉份量都幾多，食落肉質好腍。星級乾炒成嘅河粉，口感好滑。醬汁鹹度適中，而且炒得夠鑊氣，好食。原個馬拉糕 - 呈淡黃色，用筷子夾起就覺得軟熟，食薄鬆軟富蛋香，而且唔黏牙。小雞鹹水角 - 平時唔太鍾意食鹹水角，但盈館嘅小雞鹹水角好出名，試過一次都會知道佢點解桌桌必點。鹹水角餡唔會太鹹太重口味，酥皮口感同味道都好。鮮肉小籠包 - 皮薄餡靚，一食落去，湯立刻咇出嚟，十分出色！可惜食得太飽咗唔可以再點多一籠，抱住遺憾離開。（沒有用餐優惠）