Ssal Bori Ssal

營業中

休息中

又到咗一月一次嘅月經飯，今晚揀咗間好出名嘅韓國餐廳，一入去冇耐就見到出邊已經排長龍，真係好彩我哋行快咗兩步。一坐低落咗order之後，佢就會擺低三款前菜，呢度蒜真係醃得幾好食，平時我係絕對唔會掂呢啲嘢今晚都食唔停。爽脆再加辣辣地嘅口感，係幾開胃嘅。因為朋友唔食辣，所以我哋叫咗個大蜆大醬湯。除咗蜆之外，入邊仲有翠玉瓜，冬菇，洋蔥，金菇，豆腐，真係好足料㗎，普通鹹鹹地，所以配埋個飯就啱啱好。泡菜煎餅就食得得多啦，今次我哋試吓啲新嘢，叫咗個韭菜煎餅。真係滿滿嘅韭菜，粉漿反而好少，唔會太膩，韭菜愛好者一定愛爆。跟住就叫咗個豬手五花肉拼盤，我哋真係太睇得起自己啦。因為佢個份量真係太多啦。我估呢個份量起碼要四個人一齊食先至可以食得晒。佢啲豬手炆到好冧，每塊豬皮都滿滿骨膠原，好正㗎。佢啲五花腩都唔會太肥，仲連咗啲軟骨，脆卜卜嘅口感，再加埋啖啖肉，簡直係食肉獸天堂。佢會跟埋啲生菜同埋兩款醬，仲有佢哋自家製嘅醃沙律菜，全部嘢擺埋一齊，清新得來又啖啖肉，正。