強記小廚

營業中

休息中

2017年第一餐飯，同一班朋友一齊食小炒。去到旺角，朋友介紹喺朗豪坊後面山東街個頭有一間平靚正小炒。入到餐廳，可能我哋6點鐘左右入座，時間尚早，得兩台客人。我哋三個人叫咗三個小菜＋一個泡飯，整體分量多，另外值得一讚，每道菜較外面少油同少鹹。七彩鮮果牛柳粒$88味道酸酸甜甜，上面黃色嘅生果原來係蜜桃，牛樓粒用咗黑椒去醃，幾有咬口，淡淡牛肉味，估唔到牛肉同生果都幾夾。野菌煎墨魚餅$70有八件咁多，每一塊嘅份量都唔細，墨魚餅好彈牙，上面小小黑色既係切咗細細粒野菌，混合在墨魚餅當中，雖然唔係食得出野菌嘅味道，但整體不錯，煎得好香口蒜茸炒豆苗$68分量好多，第一次見外面食菜會比甘大碟，較其他小炒多三分之一，同理真心唔油，豆苗夠嫩，大家好快清晒。蠔仔泡飯$60呢個又係另一個出奇地清淡家常菜式，唔會食落好重味精，分量都不少，可以分到7-8碗，蠔仔細細粒但食落唔錯，如果鍾意重口味少少，可以落d胡椒粉。整體真係不錯，食完唔會口乾，落油唔重手，下次會再去。