築間幸福鍋物

見到網上評價唔錯，係台灣一年銷售900萬鍋嘅國民火鍋品牌，第一間海外分店就揀咗黎香港開，緊係要黎食下~套餐包湯底＋主食＋任食自助吧＋飲料＋甜品，限時100分鐘，都係$165起，平日午市主餐最低$88起添，又豐富又抵食。環境非常整潔寬闊，一啲都唔逼，坐得好舒服。今次要咗極奢套餐。湯底有石頭湯同龍蝦湯，石頭湯有唔少乾魷魚作配料，而龍蝦湯非常香濃。肉類選擇非常多，而且好鮮甜，個人最中意霜降牛同豬梅花，肉味非常濃。海鮮方面，估唔到居然有海虎蝦，大大隻，蚵仔好肥美，三文魚同魚片冇骨又嫩滑。自助吧有唔少蔬菜同丸類，任君選擇~最後仲有飲品同甜品，甜品有焦糖布丁同埋唔同味嘅奶凍。