維港灣餃子坊 (已結業)

同朋友入到元朗又熱又肚餓，咁岩經過維港灣見到每日新鮮手作餃子俾佢吸引住，咁啱我係個愛餃之人，就決定走入去試下。餐廳入面唔算大但裝修好得意，牆上面有好多搞笑漫畫，睇完會回心微笑。座位亦都好闊落，坐得舒服。▶️椒鹽花枝丸佢有好多小食揀，我地嗌咗椒鹽花枝丸。即叫即炸，新鮮炸到熱辣辣，啲香味擁埋嚟。食落亦都好夠味，花枝丸好彈牙，外脆內軟。雖然幾熱氣但真係好惹味！▶️酸辣湯肥牛烏冬湯底夠酸，亦都好足料。烏冬滑嘟嘟，同好煙韌。份量足夠，兩個人share叫埋啲小食岩岩好。▶️郊外油菜食左熱氣野就緊係要食返啲菜，解下膩。啲生菜好新鮮，夠哂甜，而且食落索索聲。▶️韭菜鮮肉湯餃主菜就緊係要試下佢地嘅新鮮手製餃子啦！8隻大約39蚊，份量唔算多但價錢合理。餃子皮薄餡靚，豬肉好有肉汁，唔會煮得太老太乾。同埋塊皮都夠滑，唔錯唔錯。佢仲會送埋一碗粉葛豬骨湯，標明係無味精嘅碗湯。調味岩岩好，唔會好油，同埋飲完都唔會口渴，好健康。佢地嘅食物選擇都幾多，價錢相對親民，而且環境唔錯，值得一試。