鏞記酒家

營業中

休息中

阿爸阿媽結婚週年，西餐佢哋麻麻哋，新派菜又怕佢哋食唔慣，諗嚟諗去，都係鏞記呢啲老字號粵菜最穩陣。因為想兩老食得精緻啲，所以特登揀咗幾味手工菜。首先個禮雲子蒸嫩蛋清 ，滑到布甸咁，面頭嘅禮雲子甘香，老人家食最啱。主菜叫咗個大海斑酥骨炒球，呢個真係考師傅功力，斑球炒得好有鑊氣，魚肉嫩滑，阿爸係咁讚。另外個鵝肝醬百花雞都好香口，雞肉上面鋪滿蝦膠，再加埋豐腴嘅鵝肝醬，口感好有層次。最後叫多個「上湯腿絲浸菜苗」，等佢哋食啲菜，個上湯好清甜。成餐飯，見到阿爸阿媽食得好開懷，不停話好食，就覺得呢餐飯值得。有時慶祝，唔使花巧，傳統嘅味道先係最好。