E Molto Buono (已結業)

點左餐之後，餐廳隨即送上一個麵包嘅小籃子，裏面分別有三款口味，亦都端上左三款口味嘅醬料！每一款都好夾好少見：辣肉腸南瓜，香草茄子醬，你能夠幻想係咩味道嗎？而且麵包嘅口感令人難以忘懷，絕對值得添食！前菜方面先有香煎法國鵪鶉配鴨乾脆雲吞，整體口感唔會好油膩，鴨肝雲吞薄脆，鵪鶉肉質嫩滑，加上咖喱泡沫蘋果沙律，更加有特色。食完前菜當然會有餐湯，嚟到法國餐廳當然要品嚐一下佢嘅龍蝦湯啦，果然大有驚喜，湯底好濃，龍蝦味好出眾，顏色紅亮。下一道菜式係香煎鵝肝果然出色，厚身嘅鵝肝煎得香軟豐潤，襯上脆卜卜嘅多士，食到朋友讚不絕口！食到嘴角有啲油脂滋嘅感覺嘅時候，職員送上一個水果味濃嘅石榴味雪芭，冰涼嘅口感帶來一點清新。主菜同樣令人滿意，慢煮寶雲酥澳洲羊架做得非常出色，羊架肉質好柔軟，羊氈味唔重，寶雲酥帶有幾分香脆滋味嘅感覺，旁邊更加有少少嘅蔬菜，好味！最後當然唔少得出色嘅法國甜品，有栗子奶蓋慕絲，栗子蓉吱成一粒粒花嘅形狀，底部有奶香濃滑嘅奶蓋，兩者結合，成為咗最完美嘅結尾！