友拉麵

營業中

休息中

朝早食咗個大早餐，夜晚都唔太餓所以食碗麵就算，聽講友拉麵質素唔錯，一於試下。一入店坐喺窗前嘅高吧台，就有如置身日本拉麵小店咁，有種好溫馨嘅感覺。呢度嘅拉麵除了有得揀硬度，仲有得選擇曲麵定直麵，店員話曲麵會較粗同更彈牙，掛湯能力亦較強，所以我揀曲。💜期間限定 黑蒜油札幌味噌拉麵黑蒜油湯底濃郁，蒜香撲鼻，湯頭唔會死鹹。拉麵有彈性，真係掛湯力比起平時食嘅直麵強得多。豚肉軟化，表面燒得微焦香口，肉脂相間但唔算肥膩，入口即化。木耳絲、玉米筍伴麵有甜味，減低咗湯口嘅咸味，平衡成碗麵味道。💜蔥山拉麵未上枱已經聞到隔籬枱碗麵嘅蔥味。直到我哋嗰碗上菜，魚介湯底同新鮮蔥綠配合而發揮出嘅誘人香氣直衝鼻腔。啲筍意想不到地爽甜脆口。食到最尾，剩返嘅蔥當然唔好嘥，全部都食晒！當食菜咁食！總結，呢個環境呢個質素，就當係無得旅行下ff 自己去咗日本，食咗碗好味嘅拉麵啦。