福元湯圓

營業中

休息中

平時小編介紹新式嘅甜品店就介紹得多，不過好似中式嘅糖水店都係第一次介紹。福元湯圓主要係賣舊式糖水為主，不過西米露同布甸都係有嘅，但一場黎到就梗係要試吓佢哋最出名嘅湯圓啦！🍴鴛鴦湯丸食湯圓嘅話小編通常都會叫最普通嘅鴛鴦湯丸，因為一來可以試晒唔同味道嘅湯圓，二來可以食到湯圓本身嘅原汁原味。呢度嘅湯圓就只有兩款口味，分別係芝麻湯圓同花生湯圓。一碗鴛鴦湯丸裏面就有三粒芝麻湯圓同兩粒花生湯圓。湯圓睇落超級大粒，而且亦都好飽滿，自然咬落去湯圓個內餡係會爆曬出嚟。黑芝麻湯圓咬開超級流心，個湯圓皮亦都比較薄。黑芝麻內餡嘅味道好香濃，可以食到有啲芝麻碎喺裏面，但味道亦都比較甜少少。而個花生湯圓方面，雖然爆餡同流心嘅程度就冇黑芝麻湯圓咁犀利，但味道上亦都唔會比黑芝麻湯圓差。花生湯圓入口有好濃郁嘅花生味，而且當中仲夾雜着左啲花生碎粒喺度，所以口感亦都係比較豐富。至於個味道方面亦都冇咁甜。配合埋個好重薑味嘅糖水真係超級夾。薑汁糖水入口偏辣，但一粒湯圓一啖糖水咁樣真係好正好滿足呀！