南大門

營業中

休息中

媽媽一直想去鯉魚門食海鮮。但聽聞嗰邊買海鮮會被劏一頸血，所以就喺觀塘街市買料入去。揀南大門，因為貪佢有落地玻璃，可邊食邊睇日落。入到去，服務員英姐就好親切咁自我介紹，話今晚有乜需要都可以搵佢，仲話食完嘢會請我地食甜品，真係好識做。我地一共食咗五款海鮮。上湯龍蝦加米粉底好好味，特別個米粉底，入味又脆口，同龍蝦好夾。清蒸老虎班都好好味，美中不足係有少少唔離骨，可能條魚身太厚啩。但總括唻講都係好好味嘅。仲有瀨尿蝦、蟶子、上湯浸蜆，都係水準以上嘅，都好滿意。全晚啲服務都好好，英姐同其他姐姐不停幫我地換碟，又好笑容，好耐無試過喺香港咁好服務。埋單計埋啲海鮮嘅價錢，每人$550，比預計平咗少少，有機會會再去。